Menu

Ini attartukkat attartorunnaaruk

Init attartugassat attartorunnaarnissaannut nalunaarnissaq nalinginnaasumik qaammammik ataatsimik sioqqutsilluni pisariaqartarpoq. Nunatsinniit Danmarkimut nuussaguit, qaammatip aallaqqaataa nallertinnagu attartorunnaarnissat nalunaarutigissavat, taamaanngippat qaammat ataaseq inimut akileeqqittariaqassaatit.

Ini tamaat – ilaannaaluunniit – nammineq iluarsaatissanerlugu imaluunniit inissiaatillit iluarsaatissaneraat nalunaarutigissavat. Piareeruit inissiaateqarfiup nakkutilliisumit misissorneqarluni nalilerneqartussaavoq.

Inigisavit iluarsaanneranut aningaasartuutit qularnaveeqqutitut akilikkannit ilanngaatigineqarnissaa ilisimassavat. Akiliutitillu sinneqarpata, taakkua illit kontonnut ikineqassapput. Inip iluarsaanneranut akiligassat qularnveeqqutitut akiliutinnit amerlaneruppata, sinnera ilinnut akiligassanngortinneqassaaq.

Nuunnerpit kingorna atuinermut akiligassinneqarniarnak innaallagissamut, imermut kiisalu kiassarnermut uuttuutit unitsinneqarnissaat eqqaamassavat. Ini attartorunnaarukku immersugassamik atsiorlugulu Nukissiorfimmut nassiussassannik tunineqassaatit.

Siumut akileriikkatit sinneqarpata sinneri aningaaserivimmi kontonnut ikineqassapput.

Inigisat attartorunnaarsimagukku, Nunatsinnut uteruit aallaqqaataaniit inissarsiortut allattorsimaffiannut inissinneqassaatit.

EQQAAMASASSAQ
Nuukkuit nuuffissavit sumiiffiata INI-mut nalunaarutiginissaa eqqaamassavat.