Efterskolet
Danmarkimi efterskolet tamani inissisimasut amerlaqaat, tunngaviusumik ilinniarnermi ukioq ataaseq arlallilluunniit kingulliit ingerlanneranni ilinniarfissat. Ilinniartut efterskolemi najugaqartarput, ilinniartunullu amerlanernut ukioq taanna sammisatigut inuttullu ineriartorfiulluartarluni.
Kalaallit Nunaanni efterskolet assigiinngitsut pingasuupput:
• Ilinniarnermut qullersaqarfik aqqutigalugu, Namminersorlutik Oqartussaniit tapiiffigineqarlutik ilinniartut.
• Ilinniartut angajoqqaaminnit akiliunneqartut.
• Ilinniartut kommunerisaminniit akiliunneqartut (inunnik isumaginnittoqarfinniit).
Ilaqutariit attaveqarfiit
Namminersorlutik Oqartussat tapiissuteqarnissaminnut piumasaqaatigaat, meeqqat ilaqutariinnik attaveqarfeqarnissaat. Ilaqutariit attaveqarfiit tassaassapput angajoqqaat sinnerlugit isumaginnittussat, taakkualu soorlu weekendini atuanngiffeqarnermilu atuarfik matoqqatillugu, ilinniartorlu napparsimalissappat ilinniartoq inisimasorisartussaavaat. Ilaqutariit attaveqarfiit aamma efterskolemi angajoqqaanut aaqqissuussisoqartillugu peqataasarnissaat naatsorsuutigineqarpoq.
Efterskole tulluartoq nassaariuk
Meeqqap pisariaqartitaanut soqutigisaanullu tulluartumik efterskolemik toqqaanissaq pingaartuuvoq.
Efterskolet immikkoortunut agguataarnikuupput: nalinginnaasoq, naqinnernik atuarsinnaanngitsunut eterskole kiisalu immikkut efterskole, taakkualu saniatigut aamma assigiinngitsunik immikkoortunik sammisaqartoqarpoq, ass. timersornermik efterskolet.
Uani; efterskolerne.dk Danmarkimi efterskoletut akuerineqarnikut tamaasa nassaarisinnaavatit. (qallunaatut)
Naleqartitatut pingaartitat pillugit atuarfiup nittartagaani atuarit. Taakkunani allassimapput ilinniartitsinermi sammineqartussatut pingaartinneqartut. Inuuneq pillugu atuarfimmi isiginneriaaseq, tassani aamma paasiniarneqarsinnaavoq.
Efterskolet amerlanersaat paasissutissiinissamut ulloqartarput, atuarfimmilu takornariartitsisarlutik. Nammineq Danmarkiliarlusi atuarfik pulaarsinnaanngikkussiuk atuarfik internetikkut (online) atuarfimmik ilisarititsisinnaanersoq aperineqarsinnaavoq.
Efterskolemik qinigaqareerussi tassani atualersinnaanermut efterskolep nittartagaatigut qinnuteqassaasi. Tamatuma saniatigut namminersorlutik Oqartussanut tapiissutissanik qinnuteqassaasi kiisalu ilaqutariinnut attaveqaatissanut atatillugu immersugassaq immersorlugu. Annertunerusumik uani atuarit; sullissivik.gl. Apeqqutissaqarussi Ilinniartitaanermut qullersaqarfimmi Efterskolet pillugit allaffeqarfimmi siunnersortit attaveqarfigisinnaavasi una normu atorlugu: +299 34 50 00 kiisalu mailikkut: efterskole@nanoq.gl.
Efterskolernissamut tapiissutit
Danmarkimi efterskolernissamut Namminersorlutik Oqartussat tapiissuteqartarput. Efterskolemut angerlamullu angalanerit tapiissutinik matussuserneqarsinnaapput. Tapiissutit qanoq qinnutigineqarsinnaaneri uani atuakkit: sullissivik.gl.
Tapiissutit atuarfinnut akiliutigineqarnissaat Ilinniartitaanermut qullersaqarfiup isumagissavaa. Taamaammat aningaasaqarnermut tunngasunik saaffiginnissutit tamarmik Ilinniartitaanermut Qullersaqarfimmut imaluunniit angajoqqaanut/ilaqutariinnut attaveqarfinnut ingerlatinneqassapput.
Angalaneq
Danmarkimut kiisalu angerlamut angalanerup aaqqissuunnissaanut Ilinniartitaanermut Qullersaqarfik ikiuussinnaavoq.
Atuariartortut Københavniip mittarfianut anngukkaangata Kalaallit Illuutaanni sulisut utaqqisarpaat, ilaqutariinnullu attaveqaatissaannut ingerlateqqittarlugit.
Immikkut ilinniartitaanerit immikkullu pisariaqartitat
Immikkut ilinniartitsisinnaaneq, ilitsorussaanngitsutut qallunaat oqaasiinik ilinniartitsineq efterskolet neqeroorutigisinnaavaat kiisalu atuartunut immikkut isumagineqarnissamik pisariaqarititsisunut tapiisoqarsinnaalluni.
Atuartoq taamatut pisariaqartitsippat atuarnissaq aallartitsinnagu tamanna isumaqatigiissutigineqartariaqassaaq. Taama iliornikkut atuartitaaneq aallartippat efterskolet tapersiinissaminnut piareersimasinnaaniassammata.
Danmarkimi efterskolet pillugit annertunerusumik uani atuarit: sullissivik.gl.