Imatut suliffissarsiorsinnaavutit

Suliffittaarusukkuit nammineq iliuuseqarnissat pingaaruteqarpoq. Illit suliannut tunngasunik sulisussarsiortunik ujaasillutit, internetikkut suliffissarsiorfissat assigiinngitsut atorluakkit. Attaveqarfigisartakkatit aqqutigalugit amerlaqisut suliffittaartarput, taamaammat nammineq iliuuseqartarlutillu ujarlertariaqarputit. Assersuutigalugu ilisarisimasatit oqaluttuuttarsinnaavatit suliffissarsiorlutit kiisalu internetikkut naapittarfiit atorluarlugit.

Atorfiit amerlaqisut ullumikkut qinnutigineqartarput mailikkut imaluunniit suliffeqarfiup nittartagaani immersugassat atorlugit. Suliffissarsioqattaarluni 75 – 100-nit itigartinneqaqqaartarneq Danmarkimi nalinginnaavoq. Inuit ilaat ukioq ataaseq marlulluunniit suliffissarsioreerlutik aatsaat suliffittaartarput.

Suliffissarsiorninni siornatigut misilittakkatit ilinniarnikuusatillu CV-mut ilanngussortariaqarpatit. Taakkua paasiuminartumik inissitsiternissaat isumatusaarneruvoq – tamakkua inissitsiterfissaat akeqanngitsut internetikkut nassaarineqarsinnaapput. Internetimi suliffissarsiorfinnut CV-t ivertissinnaavat. CV-t allannissaannut aamma Kalaallit Illuutaat ilaanni pikkorissaatitsisarput.

Siornatigut sulissunnikuusatit suliffisarsiorninni uppernarsaatitut atorsinnaanerlugit aperinissaat isumatusaarneruvoq. Taava sulissutilikkatit taakkununnga paasiniaallutik sianersinnaassapput. Suliffeqarfiit ilaanni aamma siornatigut suliffigisanniit oqaaseqaatit piumasarineqartarput. Taakkua pissarsiarinikuunngikkukkit attaveqarfigalugit allataqarnissaat qinnutigisinnaavat. Taakkuali pissarsiarinissaannut piginnaatitaaffeqanngilatit.

Imaassinnaavoq suliarinikuusannut assingusumik suliffittaarsinnaanngitsutit, taamaammat pingaartuuvoq nammineq ilinniaqqikkusussinnaanerit nutaanillu suliaqalersinnaanerit ammatillugu.
Suliffissarsiornissannut innersuussutit allat uani nassaarisinnaavatit; jobnet. (Qallunaatut)