Kalaalimerngit

Kalaalerpassuit Danmarkimiittut kalaaliminissaaleqisaqaat. Eqqiluisaarnissamut malittarisassat pissutigalugit ass. puisit arferillu neqaat pissarsiariuminaattarput.

Danmarkiliaruit imaassinnaavoq mamarilluakkannik nassarusuttutit aammami nassarsinnaavutit, taamaallaalli nammineq pissannik. CITES naapertorlugu malittarisassani kalaalimerngit inuup nammineq pigisaatut naatsorsuutigineqarput aamma naak malittarisassat naapertorlugit uumasunit illersortarialinneersuugaluarpata. Neqi 10 kg. aalisakkat 20 kg. kiisalu nerisassat allat (ass. manniit imlt. honning) 10 kg. Qerisut timmisartukkut nassiunneqarnissaat Air Greenlandip innersuussutigaa. Qerisut nassatannut ilanngullugit timisartumi nassarukkit sivisunerpaamik angalaneq akunnernik 8-nik sivisussuseqartariaqarpoq, poortukkallu qerisutut nalunaaruserneqarsimasussaallutik.

Angalaninni iluatsitsinerlullutit aqqutaani ingerlaqqissinnaajunnaaruit akiliilluni akunnittarfiit qerisitsiviinut qerisunik inissiisoqarsinnaasarpoq.

Malittarisassat uani atuakkit: airgreenland.gl. 

Danmarkimi najugaqaruit inatsisit naapertorlugit Kalaallit Nunaanni ikinngutivit arferup neqaanik mattaanillu qerisunik Royal Arctic Line aqqutigalugu nassissinnaavaatsit, taamaallaalli qilalukkap qaqortap kitaanilu tikaagulliup neqaa mattaalu nassiuteqqusaallutik. Inuit nalinginnaat qerisunik 30 kg. tikillugu nassiussisinnaapput, taakkuli 5 kiilukkaarlugit poortorsimassallutik. Malittarisassat uani atuakkit: ral.gl.